नवलपुरमा जिल्ला स्तरीय झमता गीत तथा नृत्य प्रतियोगिता हुने
नवलपुर । नवलपुरको कावासोती १७ मा रहेको इको टुरिजम युथ क्लबको आयोजनामा असोज ५ गते शनिबार कावासोती १७ अमलटारीमा ललपुर (नवलपुर) जिल्ला स्तरीय झमता गीत तथा नृत्य प्रतियोगिता हुने भएको छ ।
प्रतियोगिता पौराणिक र आधुनिक गीतमा आधारित गरेर २ तहमा हुने आज कावासोती १७ अमलटारीमा इको टुरिजम युथ क्लब कावासोतीले पत्रकार सम्मेलन गरी जानकारी गराएको छ ।
दुवै समूहमा प्रथम हुनेले १० हजार, द्वितीय हुनेले ७ हजार र तृतीय हुनेले ५ हजार रुपैयाँ पुरस्कार पाउने छन् भने सहभागी सबै समूहलाई यातायात खर्च वापत प्रति समूह १५ सय रुपैयाँ उपलब्ध गराउने आयोजकले जनाएको छ ।
यहाँ पछिल्लो चार बर्षदेखि लगातार थारु महिलाको महान पर्व जितियाको अवसर पारेर झाम्टा गीत तथा नृत्य प्रतियोगिता हुने गरेको छ ।
क्लबका अध्यक्ष बालकुमारी महतोले प्रतियोगिताको तयारी पुरा भएको बताए । प्रतियोगिताका लागि आजसम्म ६२ वटा समूहले नाम दर्ता गरिसकेको आयोजकले जनाएको छ ।
थारु समुदायको कला संस्कृति जोगाउन र युवा पुस्तामा कला संस्कृति हस्तान्तरणका लागि प्रतियोगिता आयोजना गरिएको अध्यक्ष महतोले बताए ।
प्रतियोगिता कावासोती १७ अमलटारी पिक्निक स्पोर्ट मैदानमा हुने कार्यक्रम संयोजक मान महतोले बताए ।
