२०८३ को असारमा राजीनामा दिन्छुः प्रधानमन्त्री ओली
प्रधानमन्त्री केपी शर्मा ओलीले सरकारमाथि घेराबन्दी भएर पनि कुनै समस्या नरहेको बताएका छन्। आगामी निर्वाचनसम्म यही सत्तासमीकरण रहने उनले बताएका छन्।
नेपाल निजामती कर्मचारी संगठनको १२औँ महाधिवेशनको उद्घाटन कार्यक्रममा बोल्दै उनले दुई दलको सहमतिबमोजिम २०८३ साल असारमा आफूले राजीनामा गरेर कांग्रेसका सभापति शेरबहादुर देउवालाई प्रधानमन्त्री बनाउने दोहोर्याए।
विपक्षीले सरकार आजै ढल्यो, भोलि ढल्यो भनेर गीत गाए पनि सरकार विकास, निर्माण र सुशासनका मार्गमा सुस्पष्टताका साथ अगाडि बढ्ने बताउँदै स्थायी सरकारका रूपमा रहेको कर्मचारी वर्गले विश्वासका साथ देशको सार्वभौमसत्ता, स्वाधीनता र भौगोलिक अखण्डताको झन्डा माथि उठाउने गरी काम गर्नुपर्नेमा उनले जोड दिए।
प्रधानमन्त्री ओलीले विगतमा आफ्नै दलका नेताका कारण आफू सरकारबाट बाहिर जानुपरेको, तर आफूले जनताको समर्थनबाट मूल ढोकाबाट सरकारका आउने उद्घोष गरेकामा त्यसअनुसार सरकारको नेतृत्वमा आएको उल्लेख गरे।
