गाउँ पर्यटनका ‘पिता’ गुरुङका नाममा उद्यान – News Nepal Media
Trend

गाउँ पर्यटनका आरम्भकर्ता क्याप्टेन रुद्रमान गुरुङका नाममा यहाँ स्मृति उद्यान निर्माण हुँदै छ । सामुदायिक घरबासका ‘पिता’ले समेत चिनिने स्याङ्जाका गुरुङको सम्झनामा बागलुङ नगरपालिका–१० स्थित पर्यटकीय गाउँ भकुण्डेमा उद्यान निर्माण हुन लागेको हो ।

गुरुङको अगुवाइमा विसं २०५४ मा स्याङ्जाको सिरुबारीमा नेपालकै पहिलो सामुदायिक घरबास (होमस्टे) खुलेको थियो । त्यही बेलादेखि सिरुबारी ग्रामीण पर्यटनको गन्तव्यस्थलका रुपमा विकास हुन थालेको हो । नेपालमा सबैभन्दा पहिले गाउँ पर्यटनको अवधारणा लागू गर्नमा गुरुङले पु¥याएको योगदानलाई चीरस्थायी बनाउन उद्यान निर्माण सुरु गरिएको भकुण्डेस्थित अतिथि सत्कार घरबासका अध्यक्ष खिमबहादुर थापाले बताउनुभयो ।

घरबास सञ्चालक समितिले गण्डकी प्रदेशको पर्यटन मन्त्रालय र वडाको लगानीमा उद्यानको काम अघि बढाएको हो । अध्यक्ष थापाका अनुसार गत र चालु आवमा गरी मन्त्रालयबाट रु २० लाख बजेट आएको छ । यस्तै चालु आवका लागि वडाले पनि रु पाँच लाख बजेट दिएको

छ । “होमस्टे प्रवद्र्धन कार्यक्रमका लागि प्रदेश सरकारबाट आएको बजेटलाई उद्यान निर्माणमा खर्चेका हौँ, वडाको पनि बजेट परेको छ”, अध्यक्ष थापाले भन्नुभयो, “नेपालमा गाउँ पर्यटन र होमस्टेको अवधारणा भित्र्याउने पहिलो व्यक्तिको नाममा पार्क बनाउँदा अन्यत्रको भन्दा नयाँपन देखिने र रुद्रमान गुरुङप्रति सम्मान पनि भल्कन्छ ।”

एक सय ८० मिटर लम्बाइ र ४० मिटर चौडाइमा निर्माणाधीन उद्यानमा हालसम्म घेराबार, प्रवेशद्वार, सालिक राख्ने ठाउँलगायत संरचना बनिसकेका छन् । उद्यान परिसरमा सामुदायिक भवन, गुम्बा, बगैँचा, टिकट कक्ष, शौचालयलगायत पूर्वाधार बनाउन बाँकी छ । उद्यानको बीचमा गुरुङको अर्धकदको सालिक राखिनेछ ।

“पार्कका लागि झण्डै सवा पाँच करोडको डिपिआर बनेको छ, बेलैमा बजेटको जोहो हुन सक्यो भने उद्यान निर्माणले छिट्टै पूर्णता पाउनेछ”, अध्यक्ष थापाले भन्नुभयो, “आउँदो आवका लागि सङ्घ र प्रदेश सरकारसँग बजेट माग गरेका छौँ ।” उद्यान निर्माणमा स्थानीयवासीको श्रमदानसमेत परेको छ । उद्यान बनेपछि भकुण्डेमा नयाँ आकर्षण थपिने र त्यसले पर्यटन विकासमा टेवा पुग्ने ठानिएको छ ।

वडाध्यक्ष तिलबहादुर थापाले ग्रामीण पर्यटनका दृष्टिले भकुण्डेले प्रचुर सम्भावना बोकेको उल्लेख गर्नुभयो । उहाँले भकुण्डेमा पर्यटनमैत्री पूर्वाधारको भने खाँचो औँल्याउनुभयो । “यहाँ जोडिने सडकलाई सहज र स्तरीय बनाउन आवश्यक छ, यो विषय वडाको मात्र क्षमता र काबुमा नहुने रहेछ”, उहाँले भन्नुभयो ।

वडाध्यक्ष थापाले नगरपालिकामार्फत् पर्यटकीय पूर्वाधार निर्माणका लागि बजेट र स्रोत जुटाउन पहल गर्ने प्रतिबद्धता जनाउनुभयो । सदरमुकामदेखि १० किमि कच्ची सडकको यात्रामा भकुण्डे पुगिन्छ । पैदल जाँदा भने दुई घण्टा लाग्छ । सहरको कोलाहल र प्रदूषण पन्छाएर छिनभरमै पुगिने गन्तव्य हो, भकुण्डे ।

गाउँले जीनजीवन, संस्कृति, रहनसहन, लोभलाग्दो भू–बनोट र हावापानी त्यहाँका आकर्षण हुन् । अतिथि सत्कार घरबासले पनि भकुण्डेलाई टाढासम्म चिनाएको छ । आन्तरिकदेखि बाह्य पर्यटक घुमफिरका लागि भकुण्डे पुग्छन् । त्यहाँका ११ घरमा घरबास सेवा छ । गाउँले खानपान र पारिवारिक बसाइँका लागि पर्यटकले घरबास रोज्छन् ।

घरबाससँगै ‘भ्यूटावर’, बराहताल, बराह, भैरव मन्दिर, सङ्ग्रहालय, कुथुकर्मको लेक आदि भकुण्डेका पर्यटकीय आकर्षण हुन् । सरकारले भकुण्डे–भैरवस्थान–गाजाको दह समेटेर पर्यटकीय गन्तव्यस्थलका रुपमा सूचीकृतसमेत गरेको छ ।

प्रतिक्रिया

सम्बन्धित खवर

ताजा अपडेट
धेरै पढिएको

नारायणघाट–बुटवल सडकको दूरावस्थाले घटे लुम्बिनी जाने पर्यटक

नवलपुरमा ब्युटिसियन तालिमका सहभागीलाई दिईयो उद्यमशिलता विकास तालिम

नवलपुर सेवा समाज युएई द्वारा नवलपुरको दश वटा सामुदायिक विद्यालयहरुमा तिन लाखको अक्षयकोष स्थापना

महिला, बालबालिका तथा ज्येष्ठ नागरिक मन्त्री भगवती चौधरी नवलपुर कावासोती आउँदै

छिपछिपे सहकारी ठगी : ७ अभियुक्त पुर्पक्षमा जेल चलान

आजको राशिफल : वि.सं. २०८१ ज्येष्ठ २८ गते सोमवार || श्री पाथिभरा माताकाे कृपाले यी राशिहरूकाे चम्किनेछ भाग्य


TOP