छिपछिपे सहकारीका पीडितले निवेदन दिन अनुरोध
पूर्वी नवलपरासी — संचालक समिति र कर्मचारीको मिलोमतोमा बचतकर्ताको रकम हिनामिना गरिएको छिपछिपे उपभोक्ता सहकारी संस्थाका पीडितले प्रमाणसहित निवेदन दिन जिल्ला प्रहरी कार्यालयले आग्रह गरेको छ ।
उक्त संस्थामा बचत गरेकाहरुले साँवा-ब्याज सहितको रकम फिर्ता नपाएको भए अनुसन्धान प्रयोजनार्थ प्रमाणसहित जिल्ला प्रहरी कार्यालयमा निवेदन दिन अनुरोध गरिएको हो ।
जिल्ला प्रहरी कार्यालयले सोमबार जारी गरेको सूचनामा बचत फिर्ता लिन पर्नेहरुले आ-आफनो पास बुक, नागरिकताको फोटो कपीसहित निवेदन दिनुपर्ने उल्लेख छ । त्यही प्रमाणका आधारमा अनुसन्धान हुने प्रहरीको भनाइ छ ।
उक्त सहकारीको व्यवस्थापक तथा पूर्वअध्यक्ष योगेन्द्र पाण्डे समेतले रकम हिनामिना गरेको तथ्य र प्रमाणका आधारमा अनुसन्धान सुरु भएको र त्यसमा सघाउन बचतकर्तालाई अपिल गरेको छ ।
छिपछिपे सहकारी संस्थामा अध्यक्ष र व्यवस्थापक एउटै व्यक्ति योगेन्द्र पाण्डे रहँदा करिब १० करोड हिनामिना गरेको आशंकामा अनुसन्धान सुरु गरिएको छ । पाण्डे एउटै व्यक्ति करिब ८ वर्ष उक्त संस्थाको अध्यक्ष र व्यवस्थापक हुँदा व्यापक आर्थिक अनियमितता भएको चर्चा छ ।
बचतकर्ताले रकम फिर्ता नपाएपछि अख्तियारमा उजुरी गरेका थिए । अख्तियारले छानबिनका लागि आग्रह गरेका कारण गण्डकी प्रदेश सहकारी रजिस्टारको कार्यालयले छानबिन गर्दा त्यहाँ अनियमितता भएको फेला पारेको हो ।
हरेक महिना हिसाब हेर्ने सहकारी रजिस्टारको कार्यालयको समेत मिलोमतो रहेको बचतकर्ताको आरोप छ । – नारायण शर्मा
