महोत्तरीमा वनमारा फाँडेर वृक्षरोपण – News Nepal Media
Trend

बहुमूल्य काठका बिरुवा हुर्कन नदिने वनमारा (जङ्गली वनस्पति) फाँडेर सागरनाथ वन विकास परियोजनाले नयाँ वृक्षरोपण थालेको छ । महोत्तरी, सर्लाही र रौतहटसम्म रहेको परियोजना क्षेत्रमध्ये अहिले महोत्तरीका वनमारा झाडीक्षेत्रमा नयाँ वृक्षरोपण थालिएको हो ।

महोत्तरीमा पूर्वपश्चिम राजमार्गमुनि (दक्षिणतर्फ) बर्दिबास र गौशाला नगरपालिका क्षेत्रको वन परियोजना अधिनस्त छ । वन क्षेत्रमा राम्रा काठका बिरुवा बढ्न र हुर्कन नदिने वनमारा झाडी बढ्दै गएपछि अहिले वनमारा फाँडेर नयाँ वृक्षरोपण गर्न थालिएको परियोजनाले जनाएको हो ।

पहिलो चरणमा गौशाला नगरपालिका–१ को रामनगर कुश्माढी रेञ्ज युनिटको १८ नम्बर वन क्षेत्रमा झाडी सफा गरेर नयाँ वृक्षरोपण सुरु भएको छ । यसैगरी गौशालाकै लक्ष्मीनियाँ वन क्षेत्रमा पनि झाडी फाँडेर वृक्षरोपण गर्न थालिएको छ । पहिलो चरणमा रामनगर कुश्माढी प्लटको १७ हेक्टर र लक्ष्मीनियाँको २९ हेक्टर वन क्षेत्रमा यो काम थालिएको परियोजनाको हात्तीलेट वन व्यवस्थापन शाखाका प्रमुख विद्यासागर कर्णले जानकारी दिनुभयो । अहिले यस क्षेत्रमा खयर र मसालाटसका बिरुवा रोपिदैछन् ।

वन क्षेत्रका बिरुवा झाडीले बढ्न नसकेपछि यो फाँडेर नयाँ बिरुवा रोप्नुपरेको परियोजनाका विज्ञको भनाइ छ । खयर र मसाला चाँडै १० वर्षमै काठ तयार हुने भएको हुँदा अहिले अन्य बिरुवा नरोपिएर यिनै रोपिएको कर्ण बताउनुहुन्छ । “अहिले पछिल्ला २० दिनयता दैनिक २०० स्थानीयवासी वृक्षरोपणमा तल्लिन छन्”, परियोजनाका रेञ्जर देवनारायण चौधरी भन्नुहुन्छ, “वृक्षरोपणमा खटिएका स्थानीयवासीलाई ज्यालाबापत दैनिक रु ६ सयसमेत उपलब्ध गराइएको हुँदा कामसँगै आर्थिक राहत पनि मिलेको छ ।”

वनमारा झाडी फाँडेर खनजोत गरेपछि चारैतिर काँडेतारले बेरेर वृक्षरोपण थालिएको हुँदा अहिले रोपिएका बिरुवा राम्ररी हुर्कने परियोजनाका कर्मचारी र स्थानीयवासीले आश सङ्गालेका छन् । वृक्षरोपण गरिएको प्लटमा प्लटैपिच्छे दैनिक रेखदेख र स्याहारका लागि वन हेरालु राखिएपछि अब चाँडै रोपिएका बिरुवा हुर्कने गौशाला–१ का चन्देश्वर महतोको विश्वास छ ।

परियोजनाले क्रमशः आफ्नो क्षेत्रका वनभित्र वनमारा र बिरुवा बढ्न नदिने अन्य झारपात फाँडेर नयाँ बिरुवा रोपण बढाउँदै लगिने जनाएको
छ । अब मसाला र खयर नै रोपिने रेञ्जर चौधरी बताउनुहुन्छ । “खयर र मसाला सम्भार पाए चाँडै हलक्क बढ्छन्, यी एक वर्षमै पाँच÷छ फिटका हुने र १० वर्षमा काठको प्रयोगका लागि वयस्क भइसक्छन्”, रेञ्जर चौधरी भन्नुहुन्छ, “त्यसैले यहाँको माटो पनि यी बिरुवा हुर्कन उपयुक्त भएको हुँदा मसाला र खयर नै रोपिन थालिएको हो ।”

वृक्षरोपणको नयाँ कार्यक्रमले वन अतिक्रमण निरुत्साहित हुने अपेक्षा गरिएको छ । तीन जिल्लामा गरी अहिले करिब १२ हजार हेक्टर परियोजना क्षेत्रमध्ये ६ हजार हेक्टरभन्दा बढी महोत्तरीमै पर्छ ।

प्रतिक्रिया

सम्बन्धित खवर

ताजा अपडेट
धेरै पढिएको

नारायणघाट–बुटवल सडकको दूरावस्थाले घटे लुम्बिनी जाने पर्यटक

नवलपुरमा ब्युटिसियन तालिमका सहभागीलाई दिईयो उद्यमशिलता विकास तालिम

नवलपुर सेवा समाज युएई द्वारा नवलपुरको दश वटा सामुदायिक विद्यालयहरुमा तिन लाखको अक्षयकोष स्थापना

महिला, बालबालिका तथा ज्येष्ठ नागरिक मन्त्री भगवती चौधरी नवलपुर कावासोती आउँदै

छिपछिपे सहकारी ठगी : ७ अभियुक्त पुर्पक्षमा जेल चलान

आजको राशिफल : वि.सं. २०८१ ज्येष्ठ २८ गते सोमवार || श्री पाथिभरा माताकाे कृपाले यी राशिहरूकाे चम्किनेछ भाग्य


TOP