भोजपुरमा एक वडा अध्यक्षले आफ्नै खर्चमा तीन वटा विद्यालयका विद्यार्थीलाई निःशुल्क पोशाक वितरण गर्नुभएको छ । हतुवागढी गाउँपालिका ८ पात्लेपानीका वडाध्यक्ष प्रेमबहादुर थापाले पोशाक वितरण गर्नुभएको हो ।

वडाध्यक्ष थापाले तीन विद्यालयका कक्षा– १ देखि ५ कक्षासम्मका सय विद्यार्थीलाई पोशाक वितरण गरेको जानकारी दिनुभयो । वडाध्यक्ष थापाले भन्नुभयो,‘‘ विद्यालयमा सबै वर्ग समुदायका विद्यार्थी पढ्न आउछन् । सबैको आर्थिक अवस्था एकै खालको हुन्न । विद्यार्थीको एकरुपताको लागि आफ्नै खर्चमा पोशाक दिएको हुँ । सबै विद्यार्थी विद्यालय पोशाकमा आउन भन्ने मेरो लक्ष्य हो ।”

थापाले ती विद्यार्थीलाई टाई र पेटी दिने जानकारी दिनुभयो । थापाले आफ्नो वडाका सिंहदेवी प्राथमिक विद्यालय, शिक्षा प्रकाश प्राथमिक विद्यालय र विद्यापोखरी विद्यालयका विद्यार्थीलाई पोशाक दिनुभएको हो ।