नवलपरासी । ।पूर्वी नवलपरासीको मध्यविन्दु नगरपालिकाले मध्यविन्दु–१, सेतापानीमा रहेका ९० घर सुकुमबासीहरुलाई बुधबार निःशुल्क जग्गाधनी लालपुर्जा वितरण गरेको छ । मध्यविन्दु–१, सेतापानीमा लालपुर्जा वितरण कार्यक्रम नै राखेर नगरपालिकाले सुकुमबासीहरुलाई लालपुर्जा वितरण गरेको हो ।

यहाँ रहेका दलित सुकुमबासी, भूमिहीन सुकुमबासी र अव्यवस्थित बसोवासीहरुमध्ये पहिलो चरणमा ३४ जना दलित सुकुमबासी र ५६ जना भूमिहीन सुकुमबासीलाई लालपुर्जा वितरण गरिएको मध्यविन्दु नगरपालिकाका नगरप्रमुख भीमलाल अधिकारीले बताए ।

लालपुर्जा वितरण कार्यक्रममा नेकपा एमालेका उपमहासचिव एवं गण्डकी प्रदेशका संस्थापक मुख्यमन्त्री पृथ्वी सुब्बा गुरूङ, नवलपुर क्षेत्र नं २ का सांसद् विष्णु कार्की, प्रदेश सांसद् पदमा जिसी श्रेष्ठ, पूर्वप्रदेश सांसद् जनकलाल श्रेष्ठ, जिल्ला समन्वय समिति नवलपुरका प्रमुख बाबुराम विक, राष्ट्रिय भूमि आयोग नवलपुरका अध्यक्ष तारापति खरेललगायतको सहभागिता थियो ।

राष्ट्रिय भूमि आयोग नवलपुरका अध्यक्ष तारापति खरेलले नवलपुरमा असार–साउन सम्ममा १३ हजार बढी लालपुर्जा वितरण गरिने गरी आयोगले काम फत्ते गरेको बताए ।