नवलपुर । नवलपुरको गैडाकोट हर्कपुरमा रहेको उन्नती कल्चरल भिलेजमा कात्तिक १० गते शनिबार दशैं तथा तिहार उत्सव कार्यक्रम गर्ने भएको छ ।
आज उन्नती कल्चरल भिलेजमा आयोजित पत्रकार सम्मेलनमा दिइएको जानकारी अनुसार १ दिन चल्ने दशैं तथा तिहार उत्सव कार्यक्रम अन्तरगत नवलपुर जिल्लामा रहेको प्राकृतिक र सांस्कृतिक महत्वलाइ झल्काउने किसिमका कार्यक्रमहरु गरिने छ ।
कार्यक्रममा स्थानीय खानाहरुको स्टल, स्थानीय स्तरमा निर्मित हस्तकला, कृतिहरु र परम्परागत उत्पादनकहरु प्रवद्र्धन र विक्री स्थल राख्ने, कलाकारहरुको प्रदर्शनी, चित्रकला प्रतियोगिता आदि रहने उन्नती भिलेजका समुदाय विकास प्रबन्धक रोशना श्रेष्ठले बताउनुभयो ।
त्यसैगरी कार्यक्रममा चित्रकला प्रदर्शनी, स्थानीय उत्पादनका स्टलहरु, थारु संस्कृति झल्काउने नृत्यहरु समेत रहने जनाइएको छ ।
कार्यक्रम नवलपुरका पर्यटकीय क्षेत्रहरुको प्रचारप्रसारका लागि आयोजना गरिएको जनाइएको छ । कार्यक्रममा ५ सय बढीको सहभागिता रहने आयोजकले अपेक्षा राखेको छ ।
कार्यक्रमबाट हुने आम्दानीबाट नवलपुरका स्थानीय महिलाहरुको सीपमा सुधार गर्ने र उनीहरुलाई आर्थिक सशक्तिकरणमा सहयोग पुर्याउने जनाइएको छ ।
